Praias da Pobra do Caramiñal

A Pobra ofrece fermosos areais de augas tranquilas perfectas para o baño e para o lecer, e pódese elixir entre praias de contornos urbanos como O Areal, A Lombiña-Cabío ou A Illa-A Laxe, ou praias moito máis virxes e tranquilas como Agronovo ou Niñeiriños.

Praia da Corna

Natureza virxe

A Corna é a praia máis longa da Pobra, cuns 1.500 metros, e de natureza case virxe, pois conserva as súas lombas dunares e vexetación propia dos ecosistemas costeiros. Aínda que non é a máis resgardada das praias da Pobra, non hai ventos fortes e as súas augas son tranquilas. Un fermoso areal bastante concorrido no verán.

• Lonxitude: 1.500 metros
• Ondada: tranquila
• Tipo de area: fina
• Ocupación tempada estival: media
• Servicios: limpeza, accesos para persoas con diversidade funcional

Praia da  Illa - A Laxe

Tranquilidade protexida por un frondoso piñeiral

Este areal atópase a poucos metros da praia da Lombiña-Cabío cara ao Sur; unha praia moi tranquila para o baño e ben resgardada grazas a un fermoso piñeiral. Esta praia é ideal para pasar un día en familia nun contorno moi natural.

• Lonxitude: 400 metros
• Anchura media: 21 metros
• Ondada: moderada
• Tipo de area: branca, gran medio
• Ocupación tempada estival: media

Praia da Lombiña - Cabío

A favorita da veciñanza

As praias de Cabío e A Lombiña suman unha lonxitude de 730 metros de area branca, con augas limpas e tranquilas e con todo tipo de servizos ao seu carón: aparcamento, merendeiro, posto de salvamento, restaurantes, empresas de actividades náuticas, entre outros. Cabío é unha das grandes favoritas entre veciñanza e visitantes, cun grao de ocupación alto nos veráns, e na Lombiña destaca o seu fantástico paseo marítimo.

• Lonxitude: 730 metros
• Anchura media: 25 metros
• Ondada: tranquila
• Tipo de area: branca, gran medio
• Ocupación temporada estival: Alta
• Servicios: aparcamento, posto de socorro, merendeiro, restaurantes, actividades náuticas.

Praia de Agronovo

Unha cala naturista

Situada na parroquia de Xobre, a praia de Agronovo é en realidade unha pequena cala naturista, un areal solitario que conserva o seu estado natural e que conta con servizos básicos.

• Lonxitude: 180 metros
• Anchura media: 7 metros
• Ondada: tranquila
• Tipo de area: branca, gran fino
• Ocupación tempada estival: baixa
• Servizos: papeleiras

Praia de Niñeiriños

Un recuncho de paz

Outro exemplo de cala naturista, pequena e illada, que conserva o seu estado máis natural. Ao igual que a de Agronovo, Niñeiriños atópase tamén na parroquia do Xobre. Son as dúas únicas praias naturistas da localidade.

• Lonxitude: 250 metros
• Anchura media: 7 metros
• Ondada: feble
• Tipo de area: branca
• Ocupación tempada estival: baixa
• Servizos: limpeza, socorristas

Praia do Areal

Area e mar a pé da casa

Atópase en pleno centro da Pobra do Caramiñal, cunha lonxitude de 1,1 km, area branca e augas tranquilas.  De contorno urbano, é unha boa opción para unha tarde de baño, para practicar deportes náuticos ou para camiñar polo seu paseo marítimo. Ao outro lado da desembocadura do río Xundeirama está a praia de Santo Antonio, única accesible para mascotas, xunto coa zona sur da praia do Areal.

• Lonxitude: 1.100 metros
• Anchura media: 17 metros
• Ondada: augas tranquilas
• Tipo de area: branca, gran medio
• Ocupación temporada estival: media-alta